You are here

A Foz do Miñor, unha cloaca ao aire libre

A Foz do Miñor, unha xoia da natureza incluída na rede Natura, está dende hai anos convertida nunha cloaca ao aire libre que impide a comercialización do seu marisco, polos seus altísimos niveis de bacterias fecais, moi por riba dos tolerados pola lexislación. O estudo que realizamos, por encargo da Asociación Salvemos Monteferro, co apoio loxístico da Confraría de Baiona e financiamento do Concello de Baiona, ponlle cifras a este escándalo. A zona xa fora catalogada polo Plan Hidrográfico Galicia Costa nun estado “peor que malo” e o marisqueo leva paralizado unha década sen que ningunha autoridade se sinta concernida. A razón principal é as graves deficiencias na rede de saneamento dos Concellos de Gondomar, Nigrán e Baiona. O río Miñor leva, xa antes do seu paso pola depuradora, valores maiores de 3000 Escherichia coli, unha bacteria presente nas feces humanas, por 100 mL. A puntilla ponna a depuradora de Gondomar, que causa un incremento destes valores a máis de 5000 augas abaixo. O descontrol é xeralizado. Por poñer un exemplo, a praza de abastos da Ramallosa verque, directamente ao río Miñor, augas con máis de 5000 E coli/ 100 mL. O único punto positivo son os valores aceptables do río Belesar, que desemboca na marxe sur da Foz. Por se isto fose pouco, o río Muiños na súa desembocadura en Praia América leva perto de 7000 E.coli/100 mL e xa se deron casos de intoxicacións por bañarse neste turístico areal. Esperemos que as institución non agarden a que haxa casos aínda máis graves para remediar o problema mediante investimento en saneamento e depuración. Gástanse os cartos en cousas ben menos importantes.

A continuiación pódese descargar o informe completo.

Compartir: 

© 1995 - 2019 Equipo de investigación ECOTOX.